Wever: Voorjaarsnota 2026 ta enfoca riba proteha economia y poder di compra

ORANJESTAD - Minister di Finansa Geoffrey Wever a entrega e Voorjaarsnota 2026 na Parlamento, incluyendo e prome cambio di presupuesto pa 2026.

E documento ta enfoca principalmente riba medidanan financiero pa mitiga e impacto economico di e conflicto na Iran, especialmente e subida di prijs di petroleo. Como parti di e medidanan, gobierno a baha accijns riba gasoline y a elimina accijns riba diesel, cu un costo estima di 5.1 miyon florin.

Segun e nota, e meta principal ta proteha e poder di compra di ciudadanonan y mantene estabilidad economico. Tambe a wordo indica cu ministerionan a haci diferente ahustenan interno pa crea espacio financiero y buffer pa enfrenta posible impacto adicional riba economia di Aruba.

E presupuesto supletorio awor lo sigui e proceso di revision na CAft y Raad van Advies prome cu e wordo presenta oficialmente na Parlamento.