PPA ta pidi inversion urgente den EPB: “Beroepsonderwijs no por keda atras”

ORANJESTAD - Durante un bishita na EPB Hato, parlamentario Eduard Pieters a haci un yamada urgente pa mas inversion den beroepsonderwijs na Aruba. Segun dje, Aruba no por papia di crecemento economico mientras scolnan practico manera EPB ta sigui deteriora.

Pieters a expresa preocupacion grandi tocante e condicionnan di e edificio, cu tin mas di 30 aña, incluyendo daknan cu buraco y infrastructura cu ta causa gasto halto. El a elogia e docentenan pa e trabou cu nan ta haci cu poco recurso, describiendo nan esfuerzo como “milager”.

PPA ta critica cu beroepsonderwijs ta wordo trata manera un sector di dos categoria, apesar cu Aruba tin gran necesidad di chefnan, tecniconan, artisanonan y otro personal practico califica. Pieters a bisa cu EPB y EPI mester mas apoyo y modernisacion, incluyendo movemento cu e ley di beroepsonderwijs.

Segun Pieters, un posible inversion di 7 of 8 miyon florin no mester wordo mira como gasto, pero como un inversion den futuro y capital humano di Aruba. Su mensaje final tabata cu gobierno mester laga solucion temporal y finalmente haci inversion serio den enseñansa practico.