Gobierno ta warda sentencia den caso di e-step mientras Dowers ta para firme

ORANJESTAD - E debate riba e uso di electric bicycle, e-step y e-scooter riba camindanan publico ta drentra den un fase decisivo,awor cu gobierno y operadonan comercial ta warda cu atencion e sentencia di corte den e caso sumario cu lo wordo trata diabierna 8 di mei proximo. Asina e mandatario di husticia Arthur Dowers a informa diahuebs. 

CONFERENCIA DI PRENSA 

E mandatario a recorda cu e asunto a cuminza oficialmente dia 21 di april, ora cu  Dowers, durante un conferencia di prensa, a anuncia un maneho mas duro contra e uso ilegal di vehiculonan electrico riba caminda publico. Segun e minister, e-step, e-bike y e-scooter actualmente no tin e base legal necesario pa opera libremente riba via publico.

Na mes momento, Dowers a comunica cu companianan cu ta huur of exploita e vehiculonan aki comercialmente, lo a ricibi oportunidad pa kita nan equipo for di espacionan publico voluntariamente.

A ENTAMA CASO CONTRA GOBIERNO

Poco dia despues di e anuncio, un di e operadonan afecta a presenta un caso sumario contra gobierno, cuestionando e maneho di ministerio. Diahuebs 29 di april, autoridadnan a confisca varios vehiculo electrico cu tabata riba tereno publico den area hotelero. E operador, pa medio di su abogado, despues a solicita un “ordemaatregel” pa recupera e vehiculonan cu a wordo pone den custodia di gobierno.

A HAYA SA KEN TA OPERA E COMPANIA

Segun gobierno, promé cu e caso legal a cuminza, ningun instancia oficial tabata sa exactamente ken tabata opera e cantidad di e vehiculonan electrico riba camindanan publico, mirando cu hopi di nan no tin registro oficial, seguro, inspeccion tecnico ni permiso comercial.

ACTUANDO CONFORME LEY Y NO EMOCION POLITICO

Gobierno ta argumenta cu e decision di Dowers no ta motiva pa emocion of reaccion politico, pero ta basa riba leynan existente y conseho tecnico di un comision di siguridad den trafico. E comision aki ta consisti di experto legal y tecnico di Ministerio Publico, DTI, DWJZ, polis y funcionario di ministerio.

Importante den e decision temporal di corte, segun gobierno, ta cu huez no a duna autorizacion directo pa sigui renta y usa e vehiculonan libremente. Contrario na esey, corte a enfatisa cu autoridadnan ainda tin derecho pa controla y actua contra usuarionan cu ta usa e vehiculonan ilegalmente riba camindanan publico.

Mientras tanto, Minister Dowers ta mantene su posicion cu siguridad y orden den trafico mester ta prioridad. Gobierno ta spera cu e sentencia final den e caso sumario lo trece mas clarificacion legal tocante futuro di e-step, e-bike y otro vehiculo electrico riba Aruba.