MEP ta pone restauracion di Fort Zoutman den contexto historico: “No ta un proyecto politico!’

ORANJESTAD - Despues cu e siman aki gobierno di Mike Eman a anuncia oficialmente e inicio di restauracion di Fort Zoutman y e Willem III Toren como parti di revitalisacion di centro di Oranjestad, parlamentario Xiomara Maduro di MEP a sali dilanti pa pone, segun nan, “e echo den contexto corecto”.

PROYECTO POLITICO?

Den un reaccion oficial, Maduro a expresa cu e restauracion di Fort Zoutman no a nace como un proyecto politico di campaña ni como iniciativa original di gabinete AVP-FUTURO. Segun e parlamentario, e proyecto tin un origen mucho mas profundo y historico, conecta directamente cu e disculpa oficial di De Nederlandsche Bank pa su rol den e pasado di sclavitud.

DISCULPA PUBLICO ESCLAVITUD

MEP a recorda cu na 2022, presidente di DNB, Klaas Knot, a ofrece un disculpa publico pa participacion di e banco den negoshi di sclavitud, y como parti di esey, DNB a pone €570.000 disponibel pa Fundacion Museonan Arubano pa restaura e toren di Fort Zoutman y desarrolla material educativo pa scolnan, incluyendo historia di esclavitud y personahenan historico manera Virginia.

PLACE OF MEMORY

Segun Xiomara Maduro, Fort Zoutman no ta simplemente un monumento arquitectonico, pero un “place of memory” conecta cu historia di sclavitud den region Caribe. “Nos historia no ta instrumento di campaña politico. Ta un legado cu nos tin responsabilidad di respeta, compronde y traspasa na e siguiente generacion cu integridad, berdad y dignidad,” e parlamentario a expresa.

GOBIERNO RIBA E RESTAURACION

Gobierno, entretanto, a presenta e restauracion como un paso importante pa preserva patrimonio historico y revitalisa centro di Oranjestad. Durante e anuncio, Mike Eman a enfatisa cu Fort Zoutman y Willem III Toren ta simbolonan fundamental di historia di Aruba y cu e restauracion lo wordo haci cu respet total pa autenticidad historico di e compleho.“Aunque hopi hende ta mira esaki como un solo structura, e fort tabata construi prome y despues e toren a wordo agrega como parti integral di e compleho,” Eman a splica.

Segun gobierno, e proyecto lo wordo ehecuta den diferente fase, cuminsando cu mantenimiento completo di e toren, sigui pa restauracion di murayanan y structuranan rond di e sitio. Gobierno tambe a subraya cu e trabounan lo wordo haci cu uso di materialnan original, color autentico y orientacion tecnico di Monumentenbureau Aruba.Gabinete AVP-FUTURO a agrega cu e iniciativa ta forma parti di un vision mas amplio pa restaura monumentonan historico riba isla, incluyendo posibilidadnan futuro pa reconocemento y restauracion di otro scolnan y edificio historico.

MEP TA INSISTI

Mientras tanto, MEP ta insisti cu, aunke desarrollo urbano y preservacion di patrimonio ta importante, no mester wordo perde di bista cu e origen di e proyecto ta den reconocemento historico, educacion y reflexion riba pasado di sclavitud den Reino Hulandes. NOTA: E potret ta un recreacion di e situacion y ta sirbi solamente como ilustracion pa e articulo adhunto.