Kenley Jansen, pelotero di Corsou,a subi pa top 3 di saves den historia di MLB

DETROIT/ WILLEMSTAD – Pelotero Kenley Jansen di Corsou a alcanza un logro historico den Major League Baseball (MLB), ora cu el a subi pa e di tres luga den lista di tur tempo cu mas “saves”. Awor e ta para su so na e posicion aki cu 479 saves, despues cu el a pasa Lee Smith.

Jansen a logra esaki durante su ultimo aparicion, unda e a tira un inning y permiti un hit. Poco prome, el a iguala e record di Smith, pero awor e ta definitivamente di tres den lista.

Den henter historia di MLB, solamente Mariano Rivera (652) y Trevor Hoffman (601) tin mas saves cu ne. E proximo meta pa Jansen ta 500 saves; si e logra esey, e lo bira solamente e di tres hungador cu ta yega e cifra aki.

E pelotero di 36 aña a logra mayoria di su saves cu Los Angeles Dodgers (350), y despues a sigui cu Atlanta Braves, Boston Red Sox, Los Angeles Angels y awor Detroit Tigers.

Desde 2010, Jansen ta activo den MLB y a keda conoci como un di e closernan mas consistente. Cu un ERA di 2.45, e ta sigui hunga un rol clave den bullpen di su equipo.

Cu e posicion aki riba e lista historico, Jansen ta aumenta su posibilidad pa wordo inclui den Hall of Fame, unda solamente e peloteronan mas exitoso den historia di beisból ta drenta.

SPLICACION SIMPLE DI KICO TA UN CLOSER Y UN SAVE

Un “closer” ta e pitcher cu drenta na final di un wega pa proteha e bentaha di su ekipo y cera e partido.

Un “save” ta e estadistica cu e pitcher ta ricibi ora e logra mantene e bentaha te final, generalmente den momento di hopi presion.