Trump ta menaza cu sali for di OTAN pa falta di apoyo den guera contra Iran

WASHINGTON - Presidente Donald Trump ta considera seriamente pa saca Merca for di OTAN/NAVO, despues cu otro paisnan miembro a re-usa pa brinda apoyo den e guera contra Iran. Den un entrevista, e la critica e alianza militar como un “tiger di papel”, insinuando claramente cu e no tin suficiente fuerza real.

Trump a bisa cu e tin duda hopi tempo riba e credibilidad di OTAN y cu decision pa sali ya ta casi tuma.

Prome minister britanico Keir Starmer a reacciona mesora, bisando cu el lo sigui actua den interes nacional di Reino Uni y cu Europa tin mester di un cooperacion mas fuerte riba seguridad, energia y economia.

Te ainda, apoyo europeo ta limita: base britanico ta wordo usa pa operacionnan americano, y avionnan di tanker ta opera for di Romania, pero otro apoyo militar ta falta. Pedro Sánchez di Spaña a bisa claramente cu su pais no lo participa den algo cu ta contra nan balornan.

Trump a mustra su frustracion publicamente, especialmente pasobra exportacion di energia for di Golfo Persico ta casi para despues cu inicio di e guera. Tambe, Merca no a logra rompe e bloqueo iraniano den Estrecho di Hormuz.

E la critica paisnan europeo, bisando nan pa cumpra petroleo na Merca of bai mes na Medio Oriente pa haci esey, y a critica Francia duramente, bisa cu Merca lo no lubida e falta di apoyo.