Despues di 36 ora, a logra gara djaka den avion di KLM, y e avion ta operacional atrobe!

SCHIPHOL – Despues di 36 ora, a logra gara e djaka abordo di un avion airbus di KLM. Cu esaki, e avion ta bek den servicio atrobe, KLM ta raporta diabierna. Tabatin 254 pasaheronan di KLM  pega na Aruba y Bonaire pa motibo di un pasajhero inespera. Ora e avion tabata caba den aire diaranson, rumbo pa Aruba, a descubri cu tabatin un djaka abordo. Probablemente e animal a drenta e avion na Amsterdam. Esaki a wordo confirma door di un portavoz di KLM.

E BUELO

E buelo di KLM a sali dialuna anochi for di Schiphol pa Aruba. Despues e plan tabata pa sigui pa Bonaire y despues bolbe pa Schiphol, pero esaki no a sosode. “Na mita di oceano a descubri e animal. A dicidi pa sigui. Na Aruba e pasajeronan a baha y no a sigui mas. Prome mester a limpia e avion”, asina un portavoz di KLM a conta.

Pa motibo di e cancelacionnan, 254 pasahero  a keda pega tanto na Bonaire como na Aruba. Nan a wordo ricibi den hotelnan riba e islanan. “Awor tur hende cu tabata kier sali di e islanan ta riba caminda pa bolbe nan destinacion. Nos a duna un ruta nobo na e buelo y a reemplasa un otro avion cu nos avion mas grandi”, asina e portavoz a declara. Con e animal a drenta na bordo “ta keda un misterio”; Entretanto, e djaka a wordo kita for di avion y e avion ta den aire atrobe.