WEB ta inicia BESS II: parke grandi di bateria di 35 MW cla pa 2028

ORANJESTAD — WEB Aruba a anuncia oficialmente inicio di proyecto BESS II, un sistema grandi di almacenamento di energia den bateria cu capacidad di 35 MW / 70 MWh. Segun planificacion, e proyecto lo keda cla na 2028 y, segun WEB, lo por bira e parke di bateria mas grandi den Caribe.

BESS II ta forma parti di Aruba su meta pa logra cu, na 2030, un promedio di 50% di e suministro anual di energia ta proveni di fuentenan renovabel. E bateria lo permiti almacena energia produci pa biento y solo y entrega esaki ora demanda ta mas halto. Na capacidad maximo, e sistema teoricamente por entrega 35 MW durante aproximadamente dos ora.

E sistema lo wordo integra cu WEB su parkenan di biento y solar, motornan RECIP, turbina di gas y sistemanan inteligente di maneho di energia. Segun WEB, esaki lo contribui na un red mas stabil, confiabel y sostenibel.

Pa realisa e proyecto, WEB a firma un acuerdo cu Wärtsilä. CEO Alfredo Koolman tambe a gradici Ministerio di Asuntonan Economico y Clima di Hulanda pa subsidionan cu ta contribui na transicion energetico di Aruba. Paralelamente, WEB ta preparando ampliacion di energia di biento na Vader Piet y desarrollo di posible parkenan nobo na Rincon.