Venezuela ta denuncia y repudia e ‘asalto’ di un tankero den laman Caribe

CARACAS - Venezuela a denuncia y repudia e ‘asalto’ di un tankero den laman Caribe, den un prome reaccion cu Noticiacla a ricibi diaranson anochi di su contactonan cu gobierno Venzolano. “ Republica Bolivariana di Venezuela ta denuncia y ta repudia duru loke ta constitui un robo descarado y un acto di pirateria internacional, anuncia publicamente pa presidente di Merca, cu a confesa di asalta un buque di petroleo den laman Caribe” e mensahe ta cuminsa bisa. “ No ta e prome biahe cu e ta admite esaki; den su campaña di 2024 e a afirma abiertamente cu su meta semper tabata pa keda cu petroleo venezolano sin paga ningun contraprestacion, loke ta pone cla cu e politica di agresion contra nos pais ta responde na un plan deliberado pa kita nos riqueza energetico”.

ACTO CRIMINAL 

Ademas Venezuela ta considera esaki un acto criminal. “ E acto criminal nobo aki ta suma na robo di Citgo, un activo importante di e patrimonio estrategico di tur venezolanonan, kita via mecanismo hudicial fraudulento y fuera di cualkier regla”. Segun e presidente, hende na mundo tin cu landa y lucha contra abuso imperial di Norte, manera a demostra den hopi manifestacion grandi di protesta den diferente estado di Merca y den ciudadnan di Europa. Pueblo venezolano tambe a duna un demostracion contundente den caya den Venezuela pa defende e paz di nos pais”.

MOTIBO DI AGRESION PROLONGA

Segun e presidente, den e circunstancianan aki, e motibo berdadero pa e agresion prolonga contra Venezuela a keda finalmente na cla. “No ta migracion. No ta narcotrafico. No ta democracia. No ta derecho humano. Sempre tabata tocante nos riqueza natural, nos petroleo, nos energia, y e recurso cu ta pertenece exclusivamente na pueblo venezolano”. “ Nos tambe ta denuncia cu e acto di pirateria aki tin como meta distrae atencion y tapa e fracaso total di e show politico cu a wordo monta awe na Oslo, und a e manipulacion y falta di resultado di esnan cu durante añanan a trata, sin ningun exito, pa lansa un operacion di “cambio di regimen” via violencia y den complicidad cla cu gobierno occidental.”

YAMADA

Despues e presidente a haci un yamada na tur pueblo venezolano pa keda firme den defensa di patria, y ta exhorta comunidad internacional pa rechaza e agresion vandalico, ilegal y sin precedente aki cu ta purba normalisa manera un herment pa presion y pa saca.

“ Gobierno Bolivariano ta reafirma cu e lo bay acerca tur instancia internacional cu tin pa denuncia e crimen internacional grave aki, y lo defende cu determinacion absoluto su soberania, su recurso natural y su dignidad nacional. Venezuela no lo permiti cu niun poder extranhero purba kita di pueblo venezolano loke ta pertenece na dje pa derecho historico y constitucional”. Te aki e reaccion di gobierno Venezolano, cu Noticiacla a ricibi diaranson anochi.