Ex minister Croes lo mester paga AWSS y Utilities mas di 40 mil florin bek

Ex minister Croes lo mester paga AWSS y Utilities mas di 40 mil florin bek

Posted on 11/4/2025 10:30 am AST | Updated on 11/4/2025 10:39 am AST

ORANJESTAD – Ex minister Glenbert Croes lo mester paga mas di 40 mil florin bek na Utilities Aruba y Aruba Wastewater Sustainable Solutions NV (AWSS), y mester a haci esaki dentro di 5 dia cu e carta cu e exigencia, keda entrega. Asina abogado di e dos companianan ta bisa, den un carta cu ta den poder di Noticiacla. Segun e carta, Croes lo a ricibi e suma aki, siendo cu e tabata hayando un overbruggings toelage caba, cu ta haci cu tur e placa hunto, e tabata gana mas cu un prome minister. ‘Como tal cliente kier pa paga e suma menciona bek’, e carta ta sigui bisa. Si no cumpli cu e pago den e tempo stipula, lo e companianan tuma paso legal contra e ex minister y lo por inicia cobransa obligatorio. 

VIOLA REGLA

E carta ta bisa cu, si Croes no a informa gobierno di e sumanan ‘extra’ ricibi durante un periodo specifico, cu e ta violando e obligacion di raporta. “Y esaki ta nifica cu a ricibi e sumanan “extra” incorectamente. " E enrikesemento incorecto aki por y mester wordo coregi.  Al fin y al cabo, bo a ricibi montantenan na cua bo no tabatin derecho, den violashon di un provision statutario”, e carta ta sigui bisa.  

KICO A PASA

E carta ta resumi e trayectoria di e ex minister, for di tempo cu e la ricibi su retiro na October di 2024 como minister, y cu e la cuminsa ricibi e asina yama overbruggings toelage conforme ley, esta e suma cu un gobernante ta ricibi pa un aña despues di su retiro. Durante e periodo ey, e persona no por ricibi otro entrada, of mester raporta esaki y of deduci e suma extra ricibi, di e overbruggings toelage. Segun e carta den poder di noticiacla, Croes lo a lanta un compania despues cu e la retira como minister y lo a prosegui pa firma un contracto como consehero di e compania AWSS. E tabata ricibi for di januari di e aña aki, te cu mei di e aña aki, e suma di mas di 4 mil florin pa luna, sumando un total di mas di 20 mil florin. Loke ta interesante, segun e carta, ta cu pa e periodo ey, Croes tabata ricibi un suma adicional identico di Utilities Aruba tambe, pues cu hunto ta suma mas di 40 mil florin hunto. Tur esaki mientras cu ainda  e lo tabata ricibi un overbruggings toelage di mas di 12 mil florin pa luna. Pues hunto pa luna, Croes lo tabata ricibi mas di 20 mil florin pa luna, cu ta mas cu un salario di un prome minister. Y esaki ta viola tambe e asina yama LNT norm. Esta e ley cu ta prohibi un persona gana mas cu e salario di un prome minister di respectivo pais. 

BRINGA BEK

Mientrastanto, e carta ta bisa tambe si, cu Croes si e no ta di acuerdo y cu e ta haya cu tur cos ta conforme ley, cu e mester por prueba esaki, cu documentacion, y presenta claridad den e mesun periodo cu ta exigi cu e mester paga esaki bek. ‘Esaki ta necesario pa huzga e legalidad y proporcionalidad di e pagonan, den cuadro cu e pago di overbruggings toelagek, y e aspecto legal di esaki’. Si e no por haci esaki, ta conta e ora cu e placa ricibi ta desproporcional, y cu mester wordo paga bek full of parcialmente. Ademas a sigura Croes, cu e contracto actual, no lo wordo prolonga. 

INVESTIGACION

Ta conoci cu minister di Energia Arthur Dowers, a anuncia anteriormente cu tabatin iregularidadnan cu a tuma lugar den tanto UA y AWSS, y cu lo mester a investiga esaki. E contract cu a wordo cera, lo tabata bou di auspicial di e hunta anterior di dicho companianan, cu mientrastanto a keda retira. 

  • Powered by SETAR