Trahadonan di hospital ta para trabao: “Pashentnan no mester bira victima”

ORANJESTAD — Trahadonan di Horacio Oduber Hospital (HOH) a tene un paro di trabao di dos ora diaranson mainta pa protesta contra e falta di un solucion structural pa e problemanan financiero di hospital. Presidente di sindicato ABV, Gina Maduro, a declara na Noticiacla cu e incertidumbre financiero ta frustra personal y ta afecta e posibilidad di hospital pa brinda e cuido cu pashentnan mester. E accion a sigui despues di un reunion general, durante cual sindicato a informa su miembronan tocante e situacion. Segun Maduro, desde februari ABV ta reuni regularmente cu directiva di hospital, cu a informa sindicato di un deficit cu ta sigui acumula “Nos ta haya cu e situacion ta dura demasiado largo,” Maduro a declara. “Ta pone pleister riba e herida constantemente.”

PROBLEMA MAS AMPLIO

Segun e dirigente sindical, e problema ta mas amplio cu interes di trahadonan solamente. E falta di suficiente financiamento ta afecta den pago na proveedornan, disponibilidad di material medico y limitacion di servicio na pashentnan. Maduro a indica cu cierto proveedor a sera cuenta di hospital pa motibo di factura cu no a wordo paga. E pago reciente di Afl. 15 miyon a permiti hospital atende obligacionnan urgente, pero, segun e, e no a resolve e deficit structural. E a agrega cu e periodo di pago na acreedornan a baha di aproximadamente 120 pa 90 dia.

Maduro a sostene cu un version preliminar di un rapport di Deloitte ta indica cu e financiamento actual no ta suficiente pa cubri gastonan di hospital. Segun su comprension di e documento, inflacion, diferencianan di cambio y expansion di hospital ta contribui na e aumento di gasto, incluyendo limpieza, personal, awa y coriente. ABV a solicita e rapport. Maduro a cuestiona e necesidad di un investigacion adicional pa BDO, mientras, segun e, e necesidad di mas recurso ya ta cla. “Tur e rapportnan aki ta costa placa,” el a remarca, mientras hospital ta sigui enfrenta dificultad pa mantene su servicionan.

INTERVENCION DI MINISTER

E presidente di ABV a pidi Minister di Salud pa interveni y instrui AZV pa pone suficiente recurso disponibel mientras e investigacionnan ta continua. E a referi na articulo 2a di e Landsverordening AZV como e instrumento cu, segun sindicato, minister por usa pa duna un aanwijzing. Ademas, Maduro a enfatisa e necesidad di un contract entre hospital y AZV cu ta stipula claramente prijs, volumen y calidad di e cuido cu mester wordo brinda.

META DI ACCION

E meta di e accion, segun Maduro, ta pa logra financiamento structural cu ta permiti kita e limitacionnan di servicio, reabri capacidad di operacion y endoscopia y garantisa material medico. “Percura cu finalmente pashentnan no ta bira victima,” e a declara. “Nos kier por ofrece nos pashentnan e cuido cu nan ta merece: cuido di calidad.” Potret cortesia Maritza Maduro.