Universidad di Aruba ta invita comunidad pa reflexiona riba 40 aña di democracia

ORANJESTAD — Den cuadro di 40 aña di Status Aparte, Universidad di Aruba ta organisa e encuentro “Nos Baranca, Nos Democracia”, diahuebs 12 di november 2026, di 6:00 pa 9:00 di anochi na Casibari Rock Formation. Entrada ta gratis y henter comunidad ta invita.

E actividad ta busca stimula dialogo tocante pasado, presente y futuro di democracia Arubano, cu enfoke riba representacion democratico, participacion ciudadano y e manera cu decisionnan politico ta refleja necesidadnan di pueblo.

Participantenan por intercambia idea den diferente grupo di combersacion, mientras cu arte, poesia, spoken word y teatro lo forma parti di e programa.

Un pregunta central ta con Aruba por fortalece su democracia durante e proximo 40 añanan, y con voz di comunidad por haya mas influencia den decisionnan cu ta afecta futuro di pais.

E opinionnan y ideanan colecta durante e encuentro lo wordo inclui den un proximo evento academico, pa asina continua e dialogo entre Universidad y comunidad.