Eman ta apoya dialogo nacional pa futuro di Aruba

ORANJESTAD — Promer Minister Mike Eman a expresa su apoyo pa un modelo nobo di dialogo democratico, cu ta busca pa involucra ciudadanonan, hubentud, empresarionan, sindicatonan y organisacionan social den decisionnan tocante futuro di Aruba.

Durante un reunion dialuna 9 di november, Eman a intercambia idea cu Milton Ponson di Fundacion Rainbow Warriors Core y Mildred Hofkes, consultant independiente specialisa den gobernacion a largo plazo y dialogo cu diferente sector.

Eman a reacciona positivamente riba e modelo presenta pa Hofkes, declarando: "Como Aruba nos ta bay p'e!"

Den e proximo periodo, Ponson y Hofkes lo consulta cu diferente sector, incluyendo turismo, comercio, UNESCO, sindicatonan y representantenan di hubentud, pa explora posibilidadnan di participacion democratico mas structural.

E iniciativa ta enfoca riba temanan manera turismo, calidad di bida, husticia social, medio ambiente y desaroyo economico, cu e meta di fortalece democracia y gobernacion a largo plazo na Aruba.