Trump: Merca tin control completo riba Venezuela

WASHINGTON — Presidente di Merca, Donald Trump, a declara cu su administracion ta "completamente na mando" di Venezuela despues di e operacion militar mericano di 3 di januari 2026. El a confirma tambe cu Venezuela lo tin eleccion eventualmente, pero sin menciona un fecha of calendario concreto.

Durante un intercambio cu periodista dialuna, Trump a bisa cu eleccionnan na Venezuela por tuma luga durante su mandato presidencial. "Si, na algun momento, si", el a contesta ora nan a puntra e tocante futuro democratico di e pais Suramericano.

Trump a defende e intervencion militar mericano, sigurando cu e operacion di januari a dura solamente 48 minuut y cu ningun solda mericano a perde su bida.

Segun Trump, Merca ta ricibi beneficio financiero significante for di su presencia na Venezuela, particularmente den sector petrolero. El a declara cu e ganashinan ta supera ampliamente e gastonan di e operacion militar.

"Nos ta completamente na mando y nos ta mantene bon relacion cu e gobierno", Trump a afirma.

E presidente a destaca tambe presencia di companianan petrolero internacional na Venezuela, sigurando cu e inversionnan ta beneficia economia y pueblo Venezolano.

Sinembargo, Trump no a presenta detayenan tocante e proceso electoral, e condicionnan pa organisa eleccion libre ni con e transicion politico eventualmente lo tuma luga.