Efecto Trump ta aumenta cantidad di studiante stranhero na Hulanda

DEN HAAG — Despues di tres aña di bahada, cantidad di studiante internacional cu ta cuminsa studia na universidadnan Hulandes a bolbe aumenta. Segun organisacion di universidadnan UNL, e cambio por ta relaciona cu maneho di presidente Americano Donald Trump, cu ta haci Estados Unidos menos atractivo pa studiante stranhero.

E aña academico aki, 17.600 studiante internacional a cuminsa un estudio universitario na Hulanda, 834 mas cu e limite di 16.766 acorda entre universidadnan. E aumento ta inclui 800 studiante adicional for di Europa y 300 for di paisnan pafor di Espacio Economico Europeo, particularmente Asia.

Segun UNL, e medidanan di Trump, incluyendo control mas estricto di visa y conflict pa cu universidadnan Americano, por ta motiva mas studiante pa scoge Europa.

E aumento ta bin apesar di e maneho Hulandes pa limita entrada di studiante stranhero, cu ta dirigi riba proteccion di mercado di vivienda, reduccion di gastonan publico y mantencion di idioma Hulandes den educacion superior.

Pa controla e entrada, algun universidad ta reduci cantidad di luga disponibel den programanan na Ingles, incluyendo psicologia, economia y administracion di empresa.

Presidente di UNL, Caspar van den Berg, ta enfatisa cu Hulanda tin necesidad di talento internacional, especialmente den sector tecnico, pero mester mantene un balansa.

En total, 40.800 studiante nobo a cuminsa universidad e aña aki. Cantidad total di studiante universitario na Hulanda ta aproximadamente 330.000, 2.000 menos cu aña pasa.