Herdé ta prepara infrastructura pa 1.000 vivienda na Burubundu

ORANJESTAD — Minister di Vivienda y Infrastructura Rene Herdé a reuni cu companianan di servicio publico pa coordina e infrastructura necesario pa futuro proyecto Burubundu Residences na Pos Chiquito.

E proyecto ta cubri aproximadamente 43,8 hectar y tin capacidad pa entre 850 y 1.000 vivienda.

Durante e reunion cu WEB, ELMAR, SETAR y AWSS, a discuti un plan integral pa instalacion di awa, electricidad, telecomunicacion y sistema di riool.

Un di e propuestanan principal ta crea un corredor comparti bou tera pa cable y tuberia, cu e meta di evita trabou dobla, reduci costo y facilita mantencion.

E companianan mester prepara propuestanan tecnico y financiero, incluyendo capacidad necesario, costonan, planificacion y responsabilidad pa mantencion.

Como siguiente paso, lo organisa un inspeccion conhunto di e terreno pa determina e necesidadnan y coordina e desaroyo di infrastructura.