Eman: No por sigui pospone decision riba aumento di salario minimo

ORANJESTAD — Prome Minister Mike Eman a enfatisa durante un sesion publico di Parlamento cu a yega momento pa tuma decision tocante aumento di salario minimo na Aruba, cu e meta di acerc'e gradualmente na nivel di subsistencia (bestaansminimum). Mester bisa cu esaki tabata prome cu colega Mike de Meza a dicidi di retira di e partido na final di e reunion. 

Eman a propone pa implementa e aumento den tres fase, acompaña pa medidanan di alivio pa empresanan chikito y mediano. Segun e prome minister, Aruba a conoce crecemento economico, particularmente den turismo, pero hopi famia cu ta traha tempo completo ainda tin dificultad pa cubri nan necesidadnan basico.

Eman a referi na estudionan di Economisch Bureau Amsterdam (EBA) y conseho di Sociaal-Economische Raad (SER), cu segun su explicacion ta sostene un aumento gradual, sin cu ta spera un impacto significativo riba inflacion.

E prome minister a reconoce preocupacionnan di sector comercial y a enfatisa importancia di dialogo y compensacion pa empresanan afecta. Sinembargo, el a declara cu ya a realisa suficiente estudio y cu no por sigui pospone e decision indefinidamente.

Segun Eman, aumento di salario minimo no ta solamente un gasto adicional pa empresanan, sino tambe un inversion den poder di compra, combate di pobresa y calidad di bida di comunidad.