Jennifer Arends-Reyes(AVP): Presupuesto supletorio ta inclui alivio pa pensionado, vivienda y transporte

ORANJESTAD — Parlamentario di AVP, Jennifer Arends-Reyes, ta enfatisa cu e presupuesto supletorio 2026 mester traduci den beneficio concreto pa comunidad, particularmente pa pensionadonan, famianan y personanan cu tin necesidad di vivienda accesibel.

Un di e medidanan principal ta aumento di Afl. 150 mensual den reparatietoeslag pa aproximadamente 21.000 beneficiario di AOV y AWW. Tambe e prima riba e prome Afl. 30.000 di entrada di pensionadonan ta baha di 5% pa 0%.

E propuesta ta inclui ademas Afl. 5 miyon relaciona cu prijs halto di gasolin, un prestamo di te Afl. 23 miyon na FCCA pa construccion di vivienda social pa personanan di 55 aña y mas, y casi Afl. 3 miyon pa renovacion di busstation di San Nicolas.

Arends-Reyes a pidi Gobierno pa aclara con e medidanan lo wordo ehecuta, ken lo beneficia y ki resultado concreto comunidad por spera. Tambe e kier claridad tocante un aumento di Afl. 300.000 pa DOW y dispensacion di reclamacionnan civil di te Afl. 73.865 pa clientenan di Trampolin pa Trabao.

Cu un surplus presupuestario proyecta di Afl. 80,8 miyon, e parlamentario ta insisti riba disciplina financiero y transparencia.

“Un presupuesto ta importante ora e recurso publico ta yega na resultado concreto den bida diario di nos pueblo,” Arends-Reyes a declara.