Pieters (PPA) ta exigi rapport economico riba aumento di salario minimo

ORANJESTAD — Parlamentario Eduard Pieters (PPA) ta cuestiona transparencia di Gobierno tocante e propuesta pa aumenta salario minimo na Aruba. Segun Pieters, Gobierno ta referi constantemente na un rapport economico cu Parlamento ainda no a ricibi.

Durante un conferencia di prensa, Pieters a indica cu e estudio, supuestamente encarga na Economisch Bureau van Amsterdam, mester ta disponibel pa Parlamento por evalua e consecuencia economico di e aumento salarial.

“Si tin un estudio, presenta e estudio,” Pieters a declara, cuestionando con Parlamento por controla e decision di Gobierno sin acceso na e analisis y recomendacionnan.

E parlamentario ta exigi tambe claridad tocante e plan di implementacion, consulta cu sector comercial y posibel riesgonan pa trahadonan y empresanan.

Pieters a enfatisa cu PPA ta respalda un aumento responsabel di salario minimo, pero ta insisti cu Gobierno mester presenta un base economico verificabel. “Nos no ta pidi informacion pa atrasa un decision. Nos ta pidi informacion pa por cumpli cu nos responsabilidad como Parlamento,” Pieters a conclui.