Wever: Tur 1.384 pregunta contesta; presupuesto supletorio ta warda Parlamento

ORANJESTAD — Gobierno a contesta tur e 1.384 pregunta di Parlamento riba e Prome Presupuesto Supletorio 2026 y ta wardando un fecha pa su tratamento. Minister di Finansa, Asunto Economico y Sector Primario, Geoffrey Wever, a informa esaki.

E propuesta ta inclui ahustenan na e Presupuesto 2026, cu ta den ehecucion, pa adapta esaki na necesidadnan y desaroyonan economico actual. Segun Wever, e cambionan ta necesario pa continua ehecuta e maneho di Gobierno, manteniendo disciplina financiero y cumpliendo cu normanan legal. “Nos a contesta tur e 1.384 pregunta di Parlamento, pasobra transparencia y responsabilidad ta forma parti integral di nos maneho financiero”, e minister a declara.

E propuesta a pasa pa evaluacion y conseho di College Aruba Financieel Toezicht (CAft) y Raad van Advies. Gobierno a inclui su reaccion riba e consehonan den e documentacion entrega na Parlamento.