Pieters (PPA): Centro di bario falta Afl. 1,4 miyon; unda e prioridad di Gobierno ta?

ORANJESTAD — Parlamentario Eduard Pieters (PPA) ta cuestiona prioridad di Gobierno, despues cu durante un reunion cu CEDE Aruba y representantenan di centro di bario a resulta cu e centronan mester Afl. 1,4 miyon pa sigui funciona y desaroya nan trabou adecuadamente.

Segun Pieters, durante e reunion a surgi mas seguridad pa cierto financiamento pa e proximo cinco aña. Sinembargo, el a recorda cu un amienda di PPA pa destina Afl. 5 miyon na centro di bario durante tratamento di presupuesto suplementario di 2025 no a haya suficiente sosten. E propuesta tabata inclui inversion den edificio, programa y personal. “Presupuesto ta pa mustra prioridad politico. Gobierno ta determina unda placa publico ta bay y unda e no ta bay”, Pieters a expresa.

El a enfatisa cu centro di bario ta esencial pa actividad despues di scol, contacto social pa adulto mayor y deteccion tempran di problema den famia. Segun dje, falta di inversion den prevencion por resulta den gastonan mas grandi ora problema social bira crisis.

Pieters a pidi pa trata e tema sin lucha partidista. “Si algo tin beneficio pa Aruba, nos mester por para banda di dje, sin importa ken a presenta e idea”, el a conclui.