Nuebe muher di Aruba, Corsou y Sint Maarten a haci aborto na Hulanda

ORANJESTAD — Nuebe muher cu ta biba na Aruba, Corsou y Sint Maarten a haci aborto na Hulanda durante 2025, segun cifranan di Inspectie Gezondheidszorg en Jeugd (IGJ). E rapport no ta indica cuanto di nan tabata di cada pais.

Ta pa di prome biaha cu IGJ ta registra e grupo di e tres paisnan Caribense separadamente. Anteriormente, e muhernan aki tabata inclui den un categoria general di pacientnan di otro pais.

E cifra ta cubri solamente abortonan realisa na Hulanda. E no ta inclui procedimentonan haci na e islanan mes of den otro pais y, pues, no ta representa e total di aborto entre muhernan di Aruba, Corsou y Sint Maarten.

Segun e articulo, falta di estadistica local reciente y comparabel ta dificulta pa determina e necesidad di cuido y e posibel obstaculonan cu muhernan ta enfrenta pa haya acceso na servicio.

Pa Bonaire, Sint Eustatius y Saba, e rapport ta registra 176 aborto durante 2025. E cifra aki ta referi na procedimentonan realisa riba e tres islanan y ta wordo registra separa di e nuebe casonan na Hulanda.