Victimanan di toeslagenaffaire ta busca sosten na Aruba, Boneiro y Corsou

WILLEMSTAD — Famianan cu a bira victima di e escandalo Hulandes di subsidio pa cuido di mucha (toeslagenaffaire) ta busca sosten politico y social pa continua nan proceso di recuperacion na Aruba, Boneiro y Corsou.

Segun un publicacion di Dick Drayer, Minority’s Foundation, bou di liderato di Erica Wever, ta organisa un programa di 9 te 14 di november, cu reunionnan riba e tres islanan. Na Aruba, un encuentro cu victimanan, hobennan y organisacionnan local ta programa pa 12 di november.

Na Corsou tin aproximadamente 280 mayor afecta pa e escandalo. Cifra actual pa Aruba y Boneiro no ta conoci. Aunke compensacion financiero pa hopi victima a wordo completa, varios famia ainda mester asistencia cu debe, vivienda, trabou y bienestar.

E organisacion ta preocupa pa un propuesta di Hulanda pa pone 31 di augustus 2027 como fecha limite pa solicita asistencia adicional. E fecha aki ainda no ta definitivo, pasobra e ley propuesto mester wordo aproba.