Rey Charles bao presion pa pidi disculpa pa sclavitud

ORANJESTAD — Rey Charles III di Reino Uni ta inicia un bishita na Caribe den un ambiente delicado, mientras cu e exigencia pa disculpa oficial y compensacion financiero pa e pasado di sclavitud ta aumentando.

E rey lo bishita Bahamas, Guyana y Antigua y Barbuda, caminda e lo participa na conferencia di Commonwealth, un organisacion di 56 pais. Sinembargo, den varios pais Caribense tin discusion si ta tempo pa termina cu monarquia Britanico y bira republica.

Comision di Reparacion di Bahamas a adverti e Rey pa no bin "cu man bashi", mientras cu Jamaica ta buscando claridad huridico tocante responsabilidad di Reino Uni pa sclavitud y posible compensacion.

Gobierno Britanico no ta planea di ofrece disculpa oficial ni compromete su mes na reparacion financiero. Charles anteriormente a reconoce e sufrimento causa pa sclavitud y a describi esaki como uno di e periodonan mas scur di historia.

Entre 1624 y 1807, aproximadamente 2,3 miyon Africano esclavisa a wordo transporta pa colonianan Britanico den Caribe.

Contrario na Reino Uni, Rey Willem-Alexander di Hulanda a ofrece disculpa oficial na 2023 pa e pasado di sclavitud Hulandes.