OM ta exigi 12 luna di prizon pa periodista Speed; defensa ta pidi un tercer chens

ORANJESTAD — Ministerio Publico dialuna a exigi den caso di apelacion 18 luna di prizon pa periodista y co-director di 24ora, Nelson “Speed” Cabral de Andrade, di cual seis luna condicional. Si Hof sigui e exigencia, Cabral de Andrade lo mester sinta 12 luna na prizon.

DEFENSA KIER UN DI TRES CHENS

Su abogadonan, mr. D.G. Illes y mr. V.A.V. Carlo, ta pidi Hof pa duna nan cliente un tercer chens. Nan ta solicita un castigo di 18 luna completamente condicional, combina cu 240 ora di trabou comunitario y condicionnan estricto, incluyendo un prohibicion pa tene of uza aparatonan cu por ricibi comunicacion di polis.

PROME INSTANCIA

Den prome instancia, Corte a condena Cabral de Andrade na 18 luna di prizon, di cual 12 luna condicional, cu un periodo di prueba di tres aña. Esey ta nifica cu e pena imponi tabata inclui seis luna pa sinta. E caso ta trata, entre otro, di acceso na comunicacionnan di polis via portofoon.

DEFENSA TA RECONOCE E HECHONAN

Den nan defensa tocante e castigo, e abogadonan ta bisa cu nan no ta disputa cu e soborno di un funcionario y e violacion di secreto di oficio hunto cu otro a wordo comproba. Nan ta reconoce tambe cu Cabral de Andrade a wordo condena caba den 2019 pa hechonan similar y cu e hechonan den e caso actual a tuma luga durante su periodo di prueba. “El a cruza un frontera, y el a haci esey anteriormente tambe,” e defensa ta bisa. Segun e abogadonan, nan cliente ta reconoce cu el a haci e mesun fout atrobe, tin arrepentimiento y no lo ripiti esaki. Nan ta argumenta cu, desde un registro di cas den maart 2023, Cabral de Andrade no tin acceso mas na e sistema di comunicacion di polis y cu desde e tempo ey no a comete otro hecho similar.

“E MENSAHE A YEGA”

Segun e defensa, e caso y e condenanan contra cuater periodista a manda un mensahe cla na medio di comunicacionnan na Aruba tocante e frontera cu no por wordo cruza pa obtene noticia. E abogadonan ta sostene cu nan cliente ta sigui traha sin e sistema di portofoon, usando informashon di publico, fuente, investigacion propio y contacto cu polis y husticia. Nan ta pidi Hof pa considera cu un pena condicional severo y trabou comunitario ta suficiente pa tenele responsabel. E defensa a pidi tambe pa un prohibicion riba posesion of uso di portofoon, scanner of otro aparato cu por ricibi comunicacion di polis wordo inclui como condicion.

COMPARACION CU OTRO PERIODISTANAN

E abogadonan ta señala cu tres otro periodista a wordo condena den e mesun caso. Dos di nan a ricibi pena di prizon completamente condicional y trabou comunitario pa soborno y violacion di secreto di oficio. E tercer periodista a wordo condena solamente pa violacion di secreto di oficio. Segun e defensa, e diferencia principal den e caso di Cabral de Andrade ta su condena anterior. Nan ta reconoce cu esaki mester conta den e castigo, pero ta argumenta cu un pena condicional mas halto, combina cu condicionnan estricto, lo refleha esaki sin cu e mester bay prizon. Nan ta bisa tambe cu un periodo den prizon lo afecta su trabou, e empresa unda e ta co-director y su mama di edad avansa, pa kende e ta duna cuido.

DEFENSA KIER MANTENE ABSOLUCION

Ministerio Publico a apela tambe contra e absolucion pa participacion den un organisacion criminal. E defensa ta pidi Hof pa mantene e absolucion, argumentando cu e cuatro periodistanan tabata competencia y no tabata forma un organisacion cu e estructura y cooperacion necesario pa tal acusacion. E exigencia actual di Ministerio Publico ta inclui un parti di prizon incondicional cu ta dos biaha mas largo cu e seis lunanan imponi den prome instancia. Ta awor na Hof pa tuma un decision riba e caso y e castigo. Corte lo dicta un sentencia 17 di november proximo.