Gobierno ta prepara registracion digital pa vacation rentals

ORANJESTAD — Taskforce interministerial di Gobierno a reuni pa cuminsa preparacionnan pa implementa e maneho nobo pa short-term vacation rentals na Aruba.

E grupo, cu ta inclui representantenan di Finansa, Economia, Infrastructura, Turismo y Salubridad Publico, ta enfoca riba desaroyo di un sistema di registracion digital, formulacion di condicionnan y coordinacion di e siguiente pasonan.

Segun Gobierno, e sistema lo permiti obtene un bista mas cla di propiedadnan existente y crea mas transparencia, control y structura den e sector di alojamento turistico.

Ainda no a anuncia un fecha pa cuminsamento di registracion.