Parlamento ta convoca reunion na ultimo momento den medio di tension riba salario minimo

ORANJESTAD — Den medio di informacion tocante tension entre e dos partidonan di coalicion AVP-FUTURO riba e propuesta pa acerca salario minimo na e minimo necesario pa biba (bestaansminimum), Comision Permanente di Asuntonan Economico y Sector Primario di Parlamento di Aruba a convoca un reunion cu representantenan di comercio, cu solamente tres dia di anticipacion.

INVITACION

E invitacion oficial, fecha dialuna 19 di october 2026, ta convoca e reunion pa diahuebs 22 di october, di 2:00 pa 3:30 di atardi, den sala di Parlamento. E agenda ta menciona un intercambio di pensamento cu representantenan di ATIA, Camara di Comercio (KvK), San Nicolas Business Association (SNBA) y Comerciantenan Uni Aruba (CUA), tocante e minimo necesario pa biba.

TENSION POLITICO

E convocacion cu asina poco tempo di anticipacion ta hala atencion, particularmente pa e momento politico den cual e reunion ta tuma luga.vDia 18 di october, e portal 24ora.com a publica un articulo revelando un desacuerdo serio entre AVP y FUTURO tocante e propuesta pa conecta salario minimo directamente cu e minimo necesario pa cubri gastonan basico. Segun e publicacion, durante un reunion di Conseho di Minister, cuater minister di AVP a apoya e propuesta, mientras cu Minister Gerlien Croes y Minister Geoffrey Wever, ambos di FUTURO, a vota contra e manera propone pa implementa e cambio.

E diferencia principal no ta necesariamente si salario minimo mester aumenta, sino con y ki ora esaki mester sosode.

INVESTIGACION

Mientras AVP kier e cambio, FUTURO ta considera necesario pa prome completa investigacionnan y consulta cu comercio y sindicatonan, pa evalua e consecuencia economico di un aumento di salario di e magnitud aki. 24ora.com a informa tambe cu e desacuerdo a afecta e tramite di un carta necesario pa manda e propuesta di ley na Raad van Advies pa su evaluacion. Segun e publicacion, e firma di Minister Geoffrey Wever ta un punto crucial den e proceso.  Den e contexto aki, e reunion convoca pa Parlamento por tin un importancia politico particular. E encuentro cu sector comercial por contribui na obtene e informacion y opinionnan cu FUTURO ta considera necesario prome cu un decision definitivo.

Sinembargo, e invitacion oficial no ta indica cu e reunion a wordo convoca directamente como consecuencia di e desacuerdo entre AVP y FUTURO, ni cu e tin como obhetivo resolve e diferencia entre e dos partidonan.

Di otro banda, parlamentario di AVP John Hart a rechasa publicamente e informacion tocante tension den coalicion. Den un declaracion publica pa noticiacla awe, Hart a sostene cu e coalicion ta firme y cu diferencia di opinion ta parti normal di un proceso di gobernacion. 

KICO E REUNION POR LOGRA 

 E pregunta politico awor ta si e reunion di diahuebs lo contribui na acerca e posicionnan di AVP y FUTURO, of si e diferencia riba e manera pa aumenta salario minimo lo sigui crea obstaculonan den e proceso di decision.

E encuentro di Parlamento lo brinda sector comercial oportunidad pa expresa su preocupacionnan y posible recomendacionnan, particularmente tocante e impacto cu un aumento di salario minimo por tin riba empresanan, empleo y economia di Aruba.

Pa awor, no tin indicacion den e invitacion oficial cu lo tuma un decision definitivo durante e reunion. E debate ta particularmente importante pa miles di trahador Arubiano cu actualmente ta gana menos cu loke nan tin mester pa cubri nan necesidadnan basico.