De Meza ta denuncia director di Impuesto pa supuesto acusacion falso

ORANJESTAD — Parlamentario di AVP, Mike de Meza, a presenta un denuncia contra director di Departamento di Impuesto Luenne Gomez Pieters, relaciona cu supuesto acusacionnan falso haci contra dje. Abogado Desiree Croes a declara na Noticiacla cu e asunto por envolve no solamente acusacionnan falso, sino tambe difamacion y posiblemente participacion di mas persona. Ora cu Noticiacla a acerca e director di impuesto Gomez Pieters, e la bisa cu e ta scoge concientemente pa no duna comentario y cu e ta confia den nos procesonan hudicial.

Segun Croes, e director lo a presenta informacion cu no ta corresponde cu e berdad, mientras cu, segun e abogado, ya tabatin informacion anterior cu por a demostra cu e acusacionnan contra De Meza no tabata correcto.

E abogado a splica cu acusa un persona falsamente, sabiendo cu e informacion no ta berdad, por constitui un delito castigabel bou di ley penal. Croes a referi especificamente na denuncia falso y difamacion, indicando cu e situacion ta suficientemente serio pa un investigacion penal.

Croes a confirma cu a presenta e denuncia contra e director di Impuesto y cu a solicita pa autoridadnan investiga si otro personanan tambe por tin participacion den e supuesto acusacionnan falso.

Un elemento particularmente serio den su declaracion ta e posibilidad cu e asunto no ta limita na actuacion di un solo persona.

Segun Croes, no por exclui cu por tin un grupo di persona cu a actua hunto. E abogado a menciona hasta e posibilidad di un organisacion criminal, esta, un grupo organisa cu ta coopera pa comete delitonan.

Croes ta considera importante pa un investigacion determina si e supuesto acusacionnan falso contra De Meza a surgi di actuacion individual of si otro personanan por a participa den suministramento of propagacion di informacion incorecto.

E declaracion di Croes ta pone e actuacion di director di Impuesto bou di cuestionamento legal, particularmente tocante e origen di e acusacionnan contra De Meza y si tabatin conocemento cu e informacion presenta no tabata correcto.

Sinembargo, e alegacionnan presenta pa abogado Croes ainda mester wordo investiga. No a wordo comproba cu director di Impuesto of otro persona a comete un delito. Ta responsabilidad di Ministerio Publico pa determina si tin suficiente evidencia pa un persecucion penal.