Hulanda kier castiga abuso di bandera di Aruba pa barco Ruso

DEN HAAG — Gobierno Hulandes ta prepara un ley mas severo contra barconan di e yamado shadow fleet di Rusia, cu ta uza bandera di Aruba, Corsou y Sint Maarten ilegalmente pa evita sancionnan internacional. Asina e portal Curacao Chronicle ta raporta. 

Segun e propuesta, autoridadnan lo haya mas poder pa intercepta, conduci na puerto y detene barconan cu documentonan falso. E castigo maximo pa uzo ilegal di bandera di Reino Hulandes lo aumenta te cu cuater aña di prison.

E barconan aki, principalmente tanqueronan di petroleo, ta representa tambe riesgo ambiental y di seguridad maritimo.

E propuesta lo wordo discuti dia 4 di november den Parlamento Hulandes. Aruba, Corsou y Sint Maarten mester adapta nan propio legislacion, pasobra e ley Hulandes no ta aplica automaticamente den nan awanan territorial.