Lek grave den PHP ta obliga Gobierno Hulandes, DigiD y websites di enseñansa pa bay offline

DEN HAAG — Diferente institucion gubernamental, empresanan y organisacionnan di enseñansa na Hulanda a kita nan websites y sistemanan offline como medida preventivo, despues cu a descubri dos fayo grave di seguridad den e lenguaje di programacion PHP.

Entre e servicionan afecta tin MijnOverheid.nl, DigiD, Parlamento Hulandes (Tweede Kamer), Nationaal Cyber Security Centrum (NCSC) y Autoriteit Persoonsgegevens. Tambe websites di RTL, Tweakers y sistemanan di enseñansa superior a wordo afecta.

E fayonan ta permiti hackernan infiltra sistemanan, ehecuta codigo malicioso y potencialmente horta datonan personal di usuarionan.

Empresa di seguridad Cloudflare ya a detecta intentonan di atake, mientras NCSC ainda no a confirma abuso activo. Autoridadnan ta recomenda actualisa PHP mas pronto posibel, una biaha cu e solucion di seguridad ta disponibel.