Union Europeo ta investiga Booking.com pa anuncio falso y fraude di phishing

BRUSELAS — Comision Europeo a anuncia un investigacion contra Booking.com pa determina si e plataforma ta haci suficiente pa proteha usuarionan contra anuncio falso y fraude di phishing, conforme e ley Europeo di servicionan digital (DSA).

Booking.com ta responsabel pa 66% di tur reservacionnan di hotel online na Europa. Entre 2022 y 2024, e plataforma a reporta un aumento di 500 biaha den practicanan di fraude.

E investigacion ta enfoca riba anuncio falso, proteccion di datonan personal y si Booking.com ta identifica claramente anuncionan paga.

Segun Fraudehelpdesk, den prome mitar di 2026 casi dies biaha mas persona a bira victima di fraude via plataformanan di reservacion compara cu e mesun periodo na 2025. Den mas cu 90% di e 1.072 casonan, tabata trata di phishing via Booking.com.

E daño financiero relaciona cu fraude via Booking.com a supera €82.000 den prome seis luna di 2026, compara cu mas cu €75.000 durante henter 2025.