Raad van Advies: Ley di prizon ta pendiente y KIA ta den mal estado

ORANJESTAD — Casi 40 aña despues di Status Aparte, Aruba ainda no a pone legislacion esencial di prizon na vigor. Den su conseho conmemorativo, Raad van Advies ta critica e falta di progreso di gobiernonan sucesivo y ta pidi prioridad maximo pa reforma di sistema penitenciario.

E Landsverordening penitentiaire beginselen, aproba na 2005, ainda no ta na vigor, ni e reglanan complementario. Segun e Raad, e tardansa ta afecta seguridad huridico y proteccion di derechonan di detenidonan.

Ademas, KIA ta den un estado fisico sumamente preocupante. Gobierno mes ta reconoce den presupuesto 2026 cu reparacion temporal no ta suficiente y cu un prizon nobo ta necesario. Sinembargo, e Raad ta cuestiona claridad di e plannan y disponibilidad di fondo.

E organo ta subraya cu construccion nobo so no ta suficiente: tambe mester mehora gerencia, capacitacion di personal, supervision independiente, cuido medico y proteccion huridico. Aruba ta responsabel pa maneho penitenciario, mientras Reino tin un funcion di garantia pa respetonan di derecho humano.