OM: Minister y parlamentario na Aruba no ta riba ley!

ORANJESTAD — E mesun reglanan penal ta aplica pa ciudadanonan, ministernan y parlamentarionan, pero pa procesa mandatarionan pa delitonan cometi den funcion tin un garantia adicional. Asina Ministerio Publico (OM) a splica den informacion dirigi na comunidad diahuebs.

Segun OM, un investigacion penal ta cuminsa cu un sospecho rasonabel di un delito. OM ta dirigi e investigacion, mientras hues ta controla legalidad di medidanan cu ta limita libertad of privacidad, manera detencion preventivo, tap telefon y cierto buskedanan.

Desde 1 di april 2024, articulo 476 di Codigo di Procedimiento Penal ta exigi cu OM mester haya autorisacion di Corte Comun di Husticia prome cu cita un minister of parlamentario pa un delito cometi den funcion. E garantia adicional ta destina pa evita uso di derecho penal como instrumento politico; e no ta pone mandatarionan riba ley.

Na Aruba, e procedura penal normal ta sigui aplica, cu posibilidad di apelacion y casacion. OM ta señala cu na Hulanda tin un sistema diferente pa delitonan den funcion di mandatarionan: Hoge Raad ta trata e caso directamente, sin posibilidad di apelacion. E raport Niet boven maar in de wet ta recomenda cambia e sistema hulandes pa permiti apelacion y casacion tambe.