Balashi Beer Experience ta habri 4 di oktober; ta proyecta te 250.000 bishitante pa aña

ORANJESTAD — Aruba lo haya un atraccion nobo relaciona cu un di su productonan local mas conoci. Balashi Beer Experience ta prepara pa habri oficialmente dia 4 di oktober 2026, ofreciendo bishitantenan un recorrido interactivo pa conoce mas di historia, produccion y identidad di Balashi.

E experiencia, cu ta ocupa alrededor di 1.300 metro cuadra, ta consisti di 12 zona diferente y un recorrido completo ta dura aproximadamente 90 te 120 minuut.

Durante e recorrido, bishitantenan ta pasa door di diferente fase di produccion di cerbes, cuminsando cu e ingredientenan y proceso di brewing, sigui pa embotellamento y distribucion. Tambe tin elementonan cu ta conta historia di Balashi y su desaroyo como marca local.

Un di e elementonan di e experiencia ta e historia di Buchi y su famia, cu ta forma parti di e manera interactivo cu e organizadornan kier presenta e conexion entre e producto y Aruba.

Na final di e recorrido, bishitantenan ta haya oportunidad pa participa den un tasting.

Segun informacion presenta tocante e proyecto, expectativa ta cu Balashi Beer Experience por atrae entre 200.000 y 250.000 bishitante pa aña.

E concepto ta enfoca tanto riba turista como riba residente, cu intencion di presenta Balashi no solamente como un cerbes local, pero tambe como parti di historia y identidad di Aruba.

Pa e momento, informacion presenta tocante e experiencia no ta inclui cifra concreto relaciona cu e inversion total, cantidad total di empleo crea, ni e base exacto riba cual e proyeccion di 200.000 te 250.000 bishitante pa aña ta fundamenta.