Iberostar ta ricibi reconocemento pa turismo responsabel basa riba ciencia

EAGLE BEACH — Iberostar Wave of Change a ricibi reconocemento di Foro Economico Mundial den e prome edicion di Beyond Tourism Impact Stars, cu a distingui seis solucion di sector priva pa atende retonan di industria turistico.

Segun Iberostar, e distincion ta resalta su uso di ciencia, dato y innovacion pa integra sostenibilidad den operacionnan hotelero y contribui na cuido di e destinonan unda e ta opera.

Wave of Change a cuminsa na 2017 y ta combina proteccion ambiental, bienestar socioeconomico y patrimonio cultural. Un equipo interno di mas cu 30 cientifico y specialista ta sostene e iniciativa, cu ta inclui colaboracion cu autoridadnan, empresanan y comunidadnan local.

Álvaro Sánchez, director di Sostenibilidad, Integracion y Impacto, a indica cu e enfoque ta genera ahorro midibel, reduci riesgonan pa e negoshi y mehora experiencia di huespednan.

E reconocemento a wordo entrega na Ginebra, unda Iberostar tambe a participa den discusionnan tocante con tecnologia y innovacion por contribui na capacitacion di personal y mihor empleo den turismo.