Mas cu mitar di productonan den canasta di consumo a bira mas caro

ORANJESTAD — Mas cu mitar di productonan y servicionan cu CBS ta sigui pa midi costo di bida na Aruba a registra aumento di prijs durante e ultimo 12 luna.

Segun e rapport di Indice di Prijs di Consumo pa augustus 2026, 54.9% di e productonan den e canasta di consumo a bira mas caro den comparacion cu augustus 2025. E cifra ta mustra cu aumento di prijs no ta concentra solamente den un of dos categoria, sino ta reparti riba un parti amplio di consumo diario.      

Den e mesun periodo, CPI general a subi 2.7%. Transporte tabata un di e factornan principal, cu un aumento anual di 10.7%, sigui pa restaurant y hotel cu 5.6%, restante bienes y servicio cu 4.0% y cuminda y bebida no alcoholico cu 3.8%.      

Cifranan di CBS ta mustra tambe cu prijs di bienes tabata 3.7% mas halto cu un aña pasa, mientras servicionan a registra un aumento anual di 1.4%.      

E cifranan ta confirma cu presion riba costo di bida ta wordo sinti den diferente parti di presupuesto di consumidor Arubiano.