HOH Academy ta amplia specialisacion local cu 37 empleado den programa di estudio

ORANJESTAD — Horacio Oduber Hospital (HOH) ta sigui amplia su programa di educacion profesional pa personal di cuido. Desde juni 2026, 37 empleado a cuminsa diferente trayecto di estudio y specialisacion coordina pa HOH Academy, den cooperacion cu institucionnan local y Hulandes.

Un parti importante di e expansion ta den cuido agudo. HOH Academy a cuminsa na september 2025 cu formacion pa nurse specialisa den Cuido Intensivo (IC) y Seccion di Emergencia (SEH). E aña aki a agrega e estudio Basis Acute Zorg (BAZ), organisa pa prome biaha na Aruba den cooperacion cu Universidad di Aruba y Leids Universitair Medisch Centrum. BAZ ta ofrece un base pa profesionalnan cu kier sigui specialisa den diferente area di cuido agudo.

Ademas di esaki, HOH Academy ta ofrece trayectonan den Neurofisiologia Clinico, Citologia, Master Physician Assistant, Departamento Central di Sterilisacion, cuido di Diabetes, Obstetricia, Pediatria, Dialisis y Intervencion Cardiologico, den cooperacion cu diferente institucionnan di enseñansa y academianan na Hulanda.

E modelo ta haci posibel pa profesionalnan sigui studia mientras nan ta keda traha na Aruba. Segun HOH, esaki ta reduci necesidad pa empleado mester bay exterior pa specialisa y ta yuda hospital construi capacidad local den areanan medico cu ta exigi conocemento tecnico y specialisa.

Cu e 37 participante actual, HOH Academy ta sigui desaroya e pilar di “Continuous Learning”, cu meta pa fortalece conocemento, specialisacion y disponibilidad di profesionalnan cualifica dentro di cuido na Aruba.