Flydubai a aterisa di emergencia na Arabia Saudita despues di incidente serio den cockpit

TEL AVIV — Un avion di Flydubai cu tabata na caminda di Dubai pa Tel Aviv a manda señalnan di emergencia mientras e tabata bula riba Arabia Saudita, despues di un incidente serio den cockpit.

Segun varios medio Israelita, un di e pilotonan supuestamente a intenta ataca su colega y eventualmente causa cu e avion cay. E informacion aki, sinembargo, no a wordo confirma oficialmente. Flydubai a confirma solamente cu tabatin un incidente abordo.

Durante e vuelo, e avion a manda un señal cu por a indica secuestro. Ademas, e avion a desaparece temporalmente for di radar, loke a provoca alarma na Israel. Avionnan militar Israelita a wordo manda pa intercepta e vuelo, mientras espacio aereo Israelita a wordo sera temporalmente.

Dato di Flightradar24 a mustra cu e Boeing 737 a haci un descenso abrupto di aproximadamente 14.000 pia, of mas o menos 4.267 meter, poco promer cu e señal di emergencia. Despues e avion a cambia rumbo pa Arabia Saudita y a aterrisa na Tabuk, den nort di e pais.

Segun relatonan di pasajeronan cita pa medio Israelita, e segundo piloto, cu aparentemente a wordo herida, a logra bolbe haya control di cockpit cu asistencia di pasaheronan. Imagen riba social media ta mustra un pasahero cu un camisa cu sanger, pero detaye exacto di loke a pasa ainda no a wordo confirma.

Flydubai a bisa cu un otro avion ta wordo manda pa transporta e pasaheronan pa Tel Aviv. E tipo Boeing 737 uza riba e ruta por transporta alrededor di 180 pasajero. Medio Israelita ta reporta cu por lo menos 100 ciudadano Israelita tabata abordo.