Proyecto Cunucu Butucu mester impulsa produccion local y reduci dependencia di importacion

ORANJESTAD — Gobierno di Aruba a inicia e trayecto pa desaroya Cunucu Butucu como un Area Strategico di Produccion Agricola, cu meta pa aumenta produccion local, fortalece seguridad alimenticio y reduci gradualmente dependencia di Aruba riba importacion di cuminda. Conseho di Minister a aproba e proyecto dia 18 di september.

Segun Minister di  Sector Primario Geoffrey Wever, e plan ta contempla parcela di tereno pa agricultor y criador di bestia, hunto cu infrastructura pa awa, energia sostenibel, procesamento di producto y mihor acceso na mercado.

E proyecto ta inclui investigacion pa un sistema di awa confiabel y pagabel, uzo y almacenamento di awa di yobida, energia solar, zonificacion pa agricultura y criamento di bestia, un centro pa compost y vermicultura, produccion di alimento pa bestia, un mercado central por mayor y un centro di capacitacion y conocemento den cooperacion cu DLVV Santa Rosa.

Cunucu Butucu lo complementa Agri-Innovation Park: mientras AIP ta concentra riba cultivo tecnologico, e proyecto nobo lo duna mas espacio na agricultura tradicional, criamento di bestia, procesamento y comercializacion.

Gobierno ta señala cu Aruba ta depende fuertemente di importacion di alimento, mientras productor local ta enfrenta costo halto di awa y alimento pa bestia, falta di tereno pagabel y acceso limita na mercado. Como prome paso, lo establece un Werkgroep Cunucu Butucu pa coordina preparacion y mantene dialogo cu e sector.