FEPOH ta organisa congreso tocante TOS y su “barera invisibel”

ORANJESTAD — Fundacion pa Esnan cu Problema di Oido y Habla (FEPOH) ta organisa e congreso “Un barera invisibel”, cu ta enfoca riba TOS, taalontwikkelingsstoornis, un trastorno den desaroyo di idioma cu ta afecta aproximadamente 5–7% di muchanan mundialmente.

TOS ta un condicion pa bida largo cu por dificulta siñamento di idioma, comprension, vocabulario y expresion. Esaki por crea reto den enseñansa, trabou, relacion social-emocional y bida diario, aunke e persona por tin inteligencia normal.

Desde 2016 FEPOH ta specialisando su team ambulante den TOS y ta traha estrechamente cu Kentalis na Hulanda, un organisacion specialisa den guia y sosten pa personanan cu TOS. FEPOH ta funciona como centro di experticio Cluster-2 na Aruba pa limitacion auditivo y TOS.

Durante e congreso, profesionalnan di Kentalis y Universidad di Utrecht lo comparti nan experticio y e ultimo desaroyonan cientifico riba e tema.

Dia 5 di oktober lo tin un congreso special pa educadornan na Universidad di Aruba, cu ainda tin algun cupo disponibel via plataforma “Learning Cities”. Dia 6 di oktober lo tin e congreso grandi na Renaissance Convention Center pa profesionalnan den sector medico, paramedico, social y enseñansa. E evento di dia 6 ta completamente yena.