Huez ta declara suspension di directora di Arubahuis nulo

ORANJESTAD — Corte di Prome Instancia di Aruba a declara e decision di 17 di maart 2026 pa suspende Joselin S. Croes como directora di Gabinete di Ministro Plenipotenciario di Aruba na Hulanda, conoci como Arubahuis, nulo. Den su sentencia di 21 di september ultimo, corte a conclui cu e decision no a wordo prepara suficiente y cu Gobierno no a motiva concretamente pakico e suspension tabata necesario.

Croes a wordo nombra directora te 1 di december 2028. Gobierno a suspende entrante di 18 di maart 2026, pendiendo un decision tocante un posible sancion disciplinario. E medida a sigui despues cu na december 2025 nan a prohibie entrada na Arubahuis den cuadro di un investigacion interno.

INVESTIGACION PRELIMINTARIO

Segun Gobierno, un investigacion preliminar di Departamento Recurso Humano a trece dilanti señalnan tocante, entre otro, maneho financiero, funcionamiento di e organisacion, asunto di personal y manejo di documento. Croes a rechasa e base di su suspension y a argumenta cu no a duna su oportunidad pa responde debidamente riba e kehonan.

CROES TA HAYA RAZON

Corte a duna Croes razon riba e punto ey. Segun huez, considerando e posicion prominente cu e tin, Gobierno mester a tende su version prome cu suspende. Corte a indica tambe cu e splicacion di Gobierno riba e supuesto faltanan tabata insuficiente y cu investigacion di e hechonan tabata demasiado unilateral pa sostene e conclusion cu tabatin un sospecha concreto di falta grave.

Ademas, segun e sentencia, durante e periodo di suspension no a tuma lugar mas investigacion di e hechonan. Gobierno tampoco a demostra un necesidad actual pa mantene e suspension, specialmente considerando cu Croes ya no tabata ehecutando su funcion desde anteriormente.

Corte a declara e decision di suspension nulo y a ordena Gobierno paga Afl. 2.100 na gastonan procesal. E peticion separa di Croes pa un medida provisional a wordo rechasa, pasobra, cu e anulacion di e suspension, e medida provisional ya no tabata necesario.

E sentencia ta trata legalidad di e decision di suspension. E no ta un decision final riba si Croes a comete e faltanan disciplinario cu Gobierno ta atribui na dje. Abogado pa Croes, tabata abogado Ronny Wix.  Ambos partido por apela e decision riba e bezwaar.