Laman Atlantico casi sin horcan mientras Pacifico ta hiperactivo den temporada 2026

MIAMI — Temporada di horcan 2026 ta mustra un contraste historico entre Atlantico y Pacifico. Mientras Atlantico ta pasando door di un di su temporadanan mas trankil den decenianan reciente, Pacifico oriental y central ta registra un actividad excepcionalmente fuerte.

Te awo, solamente shete tormenta tropical a forma den Atlantico y niun a wordo oficialmente clasifica como horcan. Den laman Pacifico, contrario, ya tin 18 tormenta cu nomber, incluyendo ocho horcan.

Un factor importante ta e actual El Niño fuerte, cu ta causa mas “wind shear” den Atlantico. E tipo di biento aki ta desorganisa tormentanan prome cu nan por forma. Den Pacifico, e mes fenomeno ta contribui na awa mas cayente y condicionnan mas favorabel pa tormentanan intensifica rapidamente.

Otro factor ta e secura fuerte na Etiopia. Hopi onda tropical cu eventualmente por forma tormenta na Atlantico ta origina den regionnan montañoso di Etiopia y otro parti di Africa. Falta di yobida, aire seco y stof di Sahara a reduci tanto cantidad como forza di e sistemanan aki durante 2026.

Segun investigador Phil Klotzbach di Colorado State University, Atlantico no a pasa tanto tempo sin un horcan desde 1914. E energia acumula di ciclon na Atlantico ta rond di nuebe, comparando cu un promedio di aproximadamente 88 pa final di september.

Pacifico, sin embargo, ya tin un nivel di energia ciclonico di aproximadamente 235, mas cu dobbel di loke ta normal pa e periodo aki di aña. Horcan Polo, por ehempel, a intensifica rapidamente te Categoria 5.

Meteorologonan ta indica cu ainda ta posibel pa un of dos horcan forma den Atlantico mas laat den temporada, pero 2026 ta mustra  pa bira un di e temporadanan di horcan mas trankil desde 1950.