Mas cu 2.000 aplicacion pa apenas 20 cas di FCCA ta confirma demanda urgente pa vivienda

ORANJESTAD — FCCA a ricibi mas cu 2.000 aplicacion pa solamente 20 cas den su campaña hipotecario “Yabi den bo man”, un cifra cu segun e fundacion ta confirma e demanda urgente y creciente pa vivienda na prijs rasonabel na Aruba.

E proyecto ta consisti di 17 rijtjeswoning na Rooi Bosal y 3 cas independiente na Shaba. FCCA lo construi y entrega e casnan completamente cla na e cumpradonan.

E aplicacionnan ta wordo procesa segun e orden den cual nan a drenta. FCCA ta evalua si cada solicitante a entrega documentacion valido, ta cumpli cu e criterianan, tin capacidad financiero y a pasa e proceso di screening.

E prome 20 solicitantenan cu cumpli cu tur condicion lo bin na remarca pa un cas. Si un solicitante no cualifica, FCCA lo pasa pa e siguiente aplicacion den e secuencia.

Durante e proximo dianan FCCA lo contacta tur solicitante, tanto esnan cu cualifica como esnan cu no cualifica.

Segun FCCA, e cantidad extraordinario di aplicacionnan ta un señal cla cu Aruba tin mester di mas vivienda. E fundacion ta indica cu lo sigui traha riba proyectonan nobo pa aumenta e oferta den futuro.