La Cabana ta celebra 35 aña cu reconocemento pa personal y sosten pa comunidad

EAGLE BEACH — La Cabana Beach Resort & Casino a celebra su di 35 aniversario cu un recepcion pa miembronan di directiva, invitadonan oficial y socionan. E encuentro a sigui riba e celebracion cu personal cu a tuma lugar na december.

E resort, cu a habri oficialmente dia 15 di december 1990, a pasa pa varios fase di renovacion. E recepcion a tuma lugar rond di e piscina nobo pa adulto, inaugura como parti di e fase mas reciente di mehoracionnan.

Gerente general Joe Najjar a destaca e vision di famia Mansur, e confianza di propietarionan y e contribucion di personal y socionan na e desaroyo di e resort. El a resalta tambe e oportunidadnan di empleo y e sosten pa negoshinan local.

Reconocemento special a bay na seis empleado cu ta celebra 35 aña na La Cabana: Ingrid Bremer, Efigenio Dania, Giovanni Britten, Nilda Girigori, Ninfa Jaranillo y Susan Estanislao.

Durante e evento a honra tambe miembronan di directiva cu ta retira despues di hopi aña di servicio. Ademas, directiva a otorga un donacion na La Cabana Aportando pa sostene su iniciativanan di caridad.