Tour Operators ta uni na caso di Aruba Birdlife Conservation contra Gobierno y ACF

ORANJESTAD -   E comision di dialogo representando Tour Operators Uni a confirma cu a ‘sluit aan’ na e caso cu  Aruba Birdlife Conservation a entama contra Gobierno di Aruba y Aruba Conservation Foundation (Parke Arikok). Ademas, cu esaki a haya aceso na tur e documentonan relaciona cu e demanda, pues Tour Operators Uni no solamente a realisa con desastroso e resultado por ta pa comunidad y e sector, pero tambe e implicacion economico cu esaki por trece cun’e. 

Diabierna ultimo, e comision di dialogo e reuni un biaha mas Minister di Infrastructura, drs. Rene Herde y a pidi Tour Operators Uni entrega tambe un proposicion oficial di rutanan alternativo incluyendo tambe kico nan ta spera pa saca for di e proceso di dialogo. Durante e proceso di dialogo Tour Operators Uni a logra sinta cu varios stakeholder manera DOW, DIP y tambe ACF, pero den ultimo reunion nan cu Gobierno nan tampoco tabata presente.

E reunion nan aki ta canando den ambiente positivo y tambe a trece avanse den bon direccion. Sin embargo, te cu ainda no a logra hiba dialogo cu departamento di ‘Directie Natuur en Milieu’. Segun Tour Operators Uni, e departamento di DNM tampoco no tabata presente den ningun reunion te cu ainda y esey ta di lamenta mirando cu nan ta hunga un papel importante pa loke ta nos naturalesa. 

Na mes momento, tur stakeholder ta pendiente pa confirmacion di un estudio medioambiental independiente cu profesional nan di Mexico cu lo por duna un analisis actual y mas specifico mara na condicion nan di Aruba mientras e proceso dialogo ta sigui cana su caminda. 

Mas ainda, durante e proceso di dialogo y di e caso pendiente den corte a tuma nota di uzo di potret fabrica cu inteligencia artificial y aspectonan manera e multa cu por yega 30 miyon florin y prohibicion pa tur vehiculo di motor den areanan proteha cu ta preocupante. Tour Operators Uni a haci un peticion dia 15 di September ultimo pa un ‘meeting on field’ pa hunto siña con pa cuida y conserva, pero e confirmacion pa cu esaki ta pendiente ainda. 

“Den pasado a claim neishi di Shoco na Lighthouse cu nunca tawata existi, y DNM a comfrma esaki na nos. Nos kier compronde kico nos ta proteha. Nos kier ta mas proactivo tambe den tuma decision na bienestar di nos parhanan, incluyendo Shoco”, asina e comision di dialogo informa na Gobierno, en espera di coperacion di parti di departamento di ‘Directie Natuur en Milieu’ entre otro. 

Mientras tanto, keto bay operadornan di tour ta pendiente pa un ruta delinea di aproximadamente 6 meter, for di California Lighthouse pa Kapel di Alto Vista. Si tuma e ruta di Grapefield por ehempel unda recien tabata tin un accidente fatal, operadornan di tour ta splica cu un scenario comun ta cu conductor nan tin tendencia di haci wega of core vehiculo den forma di ‘zigzag’ pasobra e caminda hancho ta duna espacio pa esaki, cual ta algo cu por evita ya caba cu e solo hecho pa delinea un ruta specifico manera a bin ta boga p’e.

 Segun Tour Operators Uni, e comportacion aki ta trece consecuencia tambe cu vehiculo nan ta kentel. Pues, tin accion nan cu por cuminsa tuma desde awor caba pa sigura cu tur operadornan y tambe vehiculonan independiente cu ta core na costa panord haci’e di forma responsabel. E colaboracion pa yega na mas solucion na corto como tambe a largo plazo lo continua mientras cu e fecha pa trata e caso den corte dia 15 di October ta aproxima.