Minister Dowers ta compaña Rob Jetten na Asamblea General di ONU

ORANJESTAD — Minister di Aruba Dowers lo forma parti di delegacion oficial di Reino Hulandes cu lo participa na e Asamblea General di Nacionnan Uni na New York. E delegacion ta inclui tambe Premier Rob Jetten di Hulanda, Premier Gilmar Pisas di Corsou y minister Conner di Sint Maarten.

Participacion di Dowers ta garantisa cu Aruba ta representa directamente den delegacion di Reino durante e encuentro internacional, cu lo trata entre otro inteligencia artificial, clima, derecho humano, seguridad maritimo, cybercriminalidad y cooperacion humanitario.

Premier Jetten lo ta na New York di 22 pa 24 di september y lo dirigi Asamblea General diahuebs. Tambe lo tin reunionnan bilateral cu hefenan di estado y gobierno y participa na diferente evento.

Minister di Asuntonan Exterior Berendsen lo enfoca riba seguridad maritimo, husticia pa Ucrania, Corte Penal Internacional, MH17 y solucion di dos estado. Minister di Husticia y Seguridad Van Weel lo firma e tratado internacional contra cybercriminalidad, cu mester facilita cooperacion entre paisnan.

Minister Sjoerdsma di Comercio Exterior y Cooperacion pa Desaroyo lo participa na reunionnan tocante asistencia humanitario, Sudan y cooperacion cu organisacionnan di Nacionnan Uni.

E participacion di Aruba hunto cu otro paisnan di Reino ta ofrece e isla un oportunidad pa participa den dialogo diplomatico internacional riba temanan cu tambe por tin consecuencia directo pa Caribe.