Powerbank ta pega candela: buelo KLM pa Corsou a bolbe Schiphol

AMSTERDAM — Un buelo di KLM cu destinacion Corsou a bira bek pa Schiphol despues cu un powerbank a pega candela abordo. E tripulacion a logra paga e candela, pero pa motibo di seguridad a dicidi regresa Amsterdam. Noticiacla a compronde cu abordo tabatin entre otro e artista cantante Izaline Calister pero no por a confirma ainda. 

E Boeing 777 tabata caba algun ora den aire y bulando riba Atlantico ora e incidente a sosode. Pasaheronan ta wordo cambia pa otro buelo, aunke no ta sigur cu tur por sali mes dia.

KLM tin reglanan specifico pa powerbank: pasahero por hiba maximo dos, cu capacidad limita, y no ta permiti usa nan of warda nan den compartimento ariba asiento. E compania ta recomenda tene nan semper cerca di bo.

Un incidente similar a sosode un aña pasa riba un vuelo di KLM entre São Paulo y Amsterdam, ora un powerbank sobrecalenta a causa huma den cabina. Esey tambe a wordo controla pa tripulacion.