OM ta alerta pa SMS falso di boet di trafico

ORANJESTAD — Ministerio Público (OM) ta alerta ciudadanonan pa un scam cu ta circula atrobe via SMS, den cual hende ta haya mensahenan falso tocante supuesto boetnan di trafico.

Segun vocero di OM, Ann Angela, e fraude cu ta wordo conecta cu Marokko a bolbe lanta su cabes awe. For di mainta, OM a ricibi alrededor di 40 yamada di ciudadanonan cu a haya e SMS. Den algun caso, e persona a indica cu nan a ricibi hasta yamadanan sospechoso.

Angela a indica cu, afortunadamente, hopi hende ta alerta y ta compronde cu e mensahenan no ta cuadra.

OM ta enfatisa cu nunca e no ta acerca ciudadano di e manera aki.

“Nos nunca no ta acerca hende di e manera aki. Tur cos di OM ta bay via carta,” Angela a bisa.

OM ta conseha publico pa no reacciona riba e SMS, no habri link sospechoso y no comparti informacion personal of bancario.