Encuesta no ta solamente di UTV: 88% di respondentenan no ta posee ni usa uno regularmente

ORANJESTAD — E debate rond di futuro di UTV y ATV na costa noord ta wordo presenta hopi biaha como un confrontacion entre tour operators y ambientalistanan. Pero e encuesta di Noticiacla a revela un tercer voz importante: e ciudadano cu no ta parti di mundo di UTV/ATV, pero cu si ta usa costa y tin un opinion firme tocante su futuro.

NO USUARIO DI UTV /ATV PERO SI TA USA E COSTA

Di 837 persona cu a contesta e pregunta, 738 — 88,2% — a bisa cu nan no ta posee ni usa un UTV of ATV regularmente.

Solamente 5,6% ta posee of usa uno regularmente, mientras 4,2% ta usa nan solamente durante un tour.

E encuesta, pues, no ta consisti principalmente di doño of usuario regular di UTV.

Na mes momento, 71,9% a bisa cu ni nan ni un miembro cercano di nan famia ta traha den sector di UTV/ATV of tour operator.

Esaki ta importante, paso e ta mustra cu e discusion ta toca un grupo mucho mas amplio cu solamente e personanan cu nan entrada depende di e industria.

COSTA NOORD TA DI HOPI TIPO DI USUARIO

87% di respondentenan ta bishita costa noord por lo menos algun biaha pa aña. Di nan, 19,2% ta bay tur siman y 21,5% algun biaha pa luna. E razon principal tampoco ta UTV. 40,7% ta bay costa pa recreacion of paseo, 21,2% pa hiking of caminata y 16,4% specificamente pa bishita lugarnan natural. Otro grupo ta bay pa deporte, pesca y diferente actividad. Solamente 2,6% a indica tour como nan motibo principal pa bishita costa noord.

Esaki ta duna un otro dimension na e conflicto actual. Costa noord no ta solamente un ruta pa UTV/ATV ni solamente un area natural pa conservacion. E ta un espacio cu diferente grupo di ciudadano ta usa simultaneamente. Pesey 60,4% ta kere cu un cierre di acceso por afecta piscadonan tradicional y otro usuario inhustamente, mientras otro 23,2% ta bisa cu esaki por pasa parcialmente. Y 68% ta kere cu Gobierno mester crea acceso distinto pa piscadonan y otro usuario tradicional.

UN ENCUESTA DOMINA PA HENDE SIN UTV

E perfil general di respondentenan tambe ta interesante. Aproximadamente 80% a nace y crece na Aruba. Otro 13,7% ta biba na Aruba mas cu 20 aña. Mas cu 70% di participante tin 45 aña of mas: 24,4% tin entre 45 y 54, 26,3% entre 55 y 64 y 20,2% tin 65 aña of mas. 54,9% ta homber y 41,3% muhe. 33,5% ta biba Noord, 18,7% Santa Cruz, 18,4% Oranjestad, 14,8% Paradera, 8,6% Savaneta y 6% San Nicolas. Tocante trabou, 55,1% ta empleado full-time, 17% independiente of empresario y 20,4% pensionado.

53,6% a bisa cu nan no ta traha directa ni indirectamente den turismo. 23,9% ta traha directamente den turismo y 17,6% indirectamente.

Esey ta nifica cu e encuesta tin un presencia considerable di hende relaciona cu turismo, pero e grupo mas grandi no ta traha den e sector.

NAN OPINION TA IMPORTANTE

Como e archivo di resultado ta presenta e cifranan agrega pa pregunta y no un contesta individual, no por determina exactamente con e 738 persona cu no usa UTV a vota riba cada pregunta.

Pero un cos si ta cla: siendo cu 88% di e muestra no ta usuario regular di UTV/ATV, e resultado general no por wordo descarta como simplemente opinion di e industria.

Na mes momento, tampoco por atribui tur e resultado na ambientalistanan.

E muestra ta compone principalmente di residente di largo plazo, personanan di edad medio y halto, usuario recreativo di costa y hende cu no tin un UTV.

Nan mensahe general ta parece ta un peticion pa costa noord wordo maneha como un espacio comparti: proteha naturalesa, regula vehiculonan, mantene acceso pa otro usuario y pone fin na un situacion caminda diferente actividad ta competi sin suficiente regla ni control.

DISCLAIMER

Un punto editorial importante: Noticiacla no ta presenta e encuesta como “opinion di Aruba completo” sin cualificacion, paso e ta un encuesta habri di Noticiacla y no un steekproef probabilistico pondera. E formulacion mas sigur ta “entre e respondentenan di e encuesta di Noticiacla”.