Olga Buckley entre 12 proyecto Caribeño cu ta haya sosten literario Hulandes

ORANJESTAD — Diesdos proyecto literario na Aruba, Boneiro, Corsou y Sint Maarten lo ricibi sosten financiero via e Caribe Literature Scheme di Dutch Foundation for Literature. Den total, €347.063 a wordo otorga den e prome ronda di 2026.

Pa Aruba, escritora y traductor Olga Buckley ta ricibi fondo pa publica un coleccion di su poesianan y un serie di tres buki pa hoben lector. E serie ta trata e tema di divorcio for di perspectiva di tres grupo di edad diferente.

Buckley ta enfatisa cu muchanan cu ta pasa door di divorcio di nan mayornan hopi biaha tin poco influencia riba loke ta sosode, mientras nan ta confronta emocion, pregunta y inseguridad. Segun e, literatura por ofrece reconocemento y sosten ora un adulto no semper ta disponibel pa duna esaki.

Na Boneiro, Biblioteka Públiko Boneiru lo traduci e buki infantil Zachter dan zout na Papiamentu y combina lectura cu actividad cultural y educativo. Na Corsou, The Journey of the Troupial lo bira un buki multilingual na Papiamentu, Hulandes y Ingles, combina cu teatro di popchi y actividad relaciona cu patrimonio.

Na Sint Maarten, Epic Center Foundation ta haya sosten pa traduci Steve Takes a Stand di Ralph Cantave na Papiamentu y Hulandes, ademas di organiza un gira di buki y workshop di lesa y skirbi pa muchanan.

E programa, inicia na 2024, ta busca duna mas espacio na literatura y idioma di e parti Caribeño di Reino, incluyendo proyecto cu fortalece Papiamentu y literatura infantil.